Omaly no napetraka amin’ ny fomba ofisialy tamin’ny toerany ny tonia mpampanoa lalàna jeneraly eo anivon’ ny fitsarana fampiakarana PGCA Charles Andriamiseza, tetsy amin’ ny fitsarana Anosy no nanatanterahina ny lanonana manetriketrika izany omaly maraina, izay natrehan’ ireo tompon’andraikitra maro eo anivon’ny fitsarana. Nanamarika noho izany ity tonia mpampanoa lalàna jeneraly eo anivon’ny fitsarana fampiakarana ity, fa vonona hanatanteraka amin’ny antsakany sy andavany ny asa izay nankinina taminy, indrindra ny fanarahana izay voalazan’ny lalàna. Tsiahivina hatrany ihany fa efa nanatanteraka ny fianianany ny faha-26 ny volana janoary lasa teo ity PGCA vaovao ity tetsy amin’ny fitsarana tampony tetsy Anosy, izay nahaterahan’ ny filoham-pirenena Hery Rajaonarimampianina , izay hiarahan’ny rehetra mahafantatra ihany koa fa efa minisitry ny Fitsarana sady mpitahiry ny fitombokasem-pirenena. Ny volana novambra lasa teo no voatendry eo amin’ny toerana izay hiandraiketany ankehitriny io ny PGCA vaovao Charles Andriamiseza, izay nisolo toerana an’i Jacques Randrianasolo. Ity farany izay nahavita amin’ny antsakany sy andavany ny asa izay notanterahina, ka nisotro ronono, ary naira-dalana tamin’ izay ihany koa ny fe-potoam-piasany. Hitondra rivo-baovao eo anivon’ny fitsarana fampiakarana noho izany i Charles Andriamiseza, izay efa nanana ny toerany teo aloha, ary mbola hitondra ihany koa ny fanavaozana eo anivon’ny fitsarana. Raha nanontaniana moa ny tenany omaly maraina dia nanambara mazava fa mbola hisy ny fifampiresahany amin’ny mpiara-miasa aminy, ary aorian’izay no hisy ihany koa ny fametrahana ny lalan’ny asa izay hotanterahina, ary ny hirariana aza dia mba hisy ny fihaonany amin’ny mpanao gazety.
Iratra Raitra