Nilatsaka ny didy omaly nandritry ny filankevitry ny minisitra notanterahana teny amin’ny lapam-panjakana Iavoloha fa dia nesorina tamin’ny toerany Randrianasolo Jacques tonia mpampanoa lalàna eo anivon’ny fitsarana ambony eto Antananarivo (procureur general près la cour d’appel d’Antananarivo),
ka ny minisitry ny fitsarana teo aloha Charles Andriamiseza no nasolo azy. Tsy nisy ny siosion-dresaka mialoha izao ny amin’ny hanesorana azy mialoha ny omaly, saingy heverina kosa fa misy antony lehibe matoa soloina tahaka izao ny tonia mpampanoa lalàna izay manana ny maha izy azy eo anivon’ny tontolon’ny fitsarana. Tsaroana fa anisan’ny hita matetika tany anaty filazam-baovao nandritra ny raharaha Claudine Razaimamonjy Randrianasolo Jacques ary matetika no tonga mihaona aminy ihany koa ireo biraon’ny sendikan’ny mpitsara (SMM) tarihan’i Fanirisoa Ernaivo. Ny 29 oktobra lasa teo ihany koa dia nanao ampamoaka tamin’ny alalan’ny facebook i Mahery Lanto Manandafy fa ray niteraka an’i Andry Andriatongarivo izay vadin’i Lalatiana Rakotondrazafy (Free News – Free FM) ny tonia mpampanoa lalàna Randrianasolo Jacques. Ka tsy fantatra na nisy nifandraisany tamin’ireo tranga ireo ny antony nanesorana azy na ahoana. Mifanandrify ihany koa amin’ny fifidianana ireo solontenan’ny mpitsara hiditra ao amin’ny filankevitra ambonin’ny mpitsara (CSM) izao fanapahan-kevitry ny fitondram-panjakana izao.
RTT